Një shtëpi është djegur të martën në mbrëmje në rrugën “Mbretëresha Teutë” në Mitrovicë, duke lënë pa strehë mbi kokë një familje gjashtë anëtarshe. Drejtori për Mbrojtje dhe Shpëtim në Komunën e Mitrovicës, Behxhet Bala, tha se zjarrfikësit janë njoftuar për shpërthimin e zjarrit në një shtëpi në orën 20:44 dhe ata menjëherë kanë dalur në vendin e ngjarjes. Sipas tij, zjarrfikësit janë përballur me zjarrin për dy orë rresht derisa është shuar. Ai tha se familja e Kapllan Çerkinit të cilës ju ka djegur shtëpia është strehuar tek fqinjët, ndërsa të mërkurën janë angazhuar zyrtarët e Drejtorisë për Shëndetësi dhe Mirëqenie Sociale që t’i bëjnë zgjidhje për strehim afatgjatë. Drejtori Bala, tha se sipas familjarëve zjarri në shtëpi ka shpërthyer nga një qiri, në kohën kur nuk kishte rrymë elektrike.
