“Të gjitha objektet shkollore duhet të jenë të gatshme për datën një shtator të këtij viti, kur duhet të filloj viti i ri shkollor”, ka thënë kryetari Kastrati.
Mitrovicë, 22 gusht
Kryetari i komunës, Avni Kastrati, i shoqëruar nga nënkryetari Rizah Haziri dhe drejtori i Drejtorisë për Arsim, Ali Bejta, kanë inspektuar gjatë vikendit objektet shkollore të komunës që janë në ndërtim dhe meremetim e sipër, me qëllim që të drejtë për së drejti të shohin se si po shkojnë punët dhe se a do të jenë të gatshme për ditën e fillimit të vitit të ri shkollor.
Në Gjimnazin “Frang Bardhi”, ku është duke u realizua projekti i meremetimit të objektit, me vlerë pre 114.000 euro, prej të cilës shumë 90.000 euro i ka dhënë USAID-i, kurse 24.000 komuna, drejtori i shkollës, Ahmet Fazliu, ju tha drejtuesve të komunës se punët janë në vlugun më të madh dhe se punëkryesit premtojnë se ato do të kryhen me kohë.
Sekretari i Shkollës së mesme të ulët “Meto Bajraktari”, Hilmi Gashi, i njoftoi drejtuesit komunal se përgjegjësit e shkollës po e mbikëqyrin me kujdes realizimin e projektit dhe po kërkojnë vazhdimisht nga punëkryesi që të shtoi intensitetin e punëve, në mënyrë që për ditën e fillimit të vitit të ri shkollor çdo gjë të jetë gati.
Në këtë shkollë është në përfundim e sipër ndërtimi i ri i aneksit shkollor me gjashtë klasë mësimi, për ndërtimin e të cilit komuna ka sigurua 160.000 euro, kurse USAID-i 100.000 euro.
Kryetari Kastrati, nënkryetari Haziri dhe drejtori Bejta inspektuan edhe punimet që po bëheshin për renovimin e objektit të Shkollës së Mesme të Ulët “Skënderbeu” dhe atij “Eqrem Çabej”, ku po ashtu nga drejtuesit e shkollave u njoftuan për përgatitjet që janë duke u bërë për fillimin e mbarë të vitit të ri shkollor dhe për mbarëvajtjen e punëve në realizimin e projekteve të filluara.
Në shkollën “Skënderbeu”, është në përfundim e sipër ndërtimi i aneksit të ri shkollor, katër klasë, që ka kushtuar 143.000 euro, nga të cilat 80.000 janë donacion i USAID-it dhe 63.000 euro të siguruara nga buxheti i komunës. Ndërkaq, në Shkollën “Eqrem Çabej”, është duke u realizuar projekti i ndërrimit të dritareve, që ka kushtuar mbi 20.000 euro, para të siguruara nga buxheti komunal.
Përveç këtyre objekteve shkollore, kryetari Kastrati me bashkëpunëtorë inspektoi edhe punimet në ndërtimin e shkollës së re të mjekësisë, në hapësirat e isha kazermave ushtarake në Bair, objekt ky mjaft modern, që do të kushtoj mbi dy milionë euro, që janë investime të Ministrisë së Arsimit të Republikës së Kosovës.
Drejtuesit e Komunës vizituan në fund edhe objektin e përfunduar shkollor në paralagjen veriore të qytetit, Suhadoll, në të ciln Ministria e Arsimit ka investuar rreth 300.000 euro.
Në të gjitha këto objekte të inspektuara, kryetari Kastrati ka biseduar me punëkryesit e projekteve dhe drejtuesit e shkollave. Nga të parët ka kërkuar përshpejtimin e punëve, përkatësisht realizimin e afateve kohore për përfundimin e punëve, në mënyrë që shkollat të jenë të gatshme për mësim qysh në ditën e parë të vitit të ri shkollor.
Ndërsa, nga drejtuesit e shkollave, kryetari Kastrati ka kërkuar që krahas përgatitjeve tjera për fillimin e vitit të ri shkollor, të mbikëqyrin edhe realizimin e punëve nga ndërmarrjet që janë kontraktuar, në mënyrë që ato të përfundojnë në afatin e paraparë kohor dhe nëse vërejnë diçka që nuk është në rregull, të informojnë drejtuesit e arsimit dhe të komunës.
“Sidoqoftë, të gjitha objektet shkollore duhet të jenë të gatshme për datën një shtator të këtij viti, kur duhet të filloj viti i ri shkollor”, ka thënë kryetari Kastrati.
Drejtori i Drejtorisë së Arsimit të komunës, Ali Bejta, ka thënë se ai ka ndërmarrë edhe masa të tjera për përgatitjet sa më cilësore për fillimin e vitit të ri shkollor, duke përmend këtu edhe gëlqerosjen e disa objekteve shkollor, për çka komuna ka ndarë 10.000 euro.
