Kryetari i komunës, Avni Kastrati, ka patur një takim me përfaqësuesit kryesor të OJQ “Bregu i Veriut”, me të cilët ka biseduar për mundësitë e kthimit sa më të shpejtë të të gjithë të zhvendosurve nga lagjet veriore të qytetit, në pronat e tyre.
Mitrovicë, 12 gusht
Kryetari i komunës, Avni Kastrati, ka patur një takim me përfaqësuesit kryesor të OJQ “Bregu i Veriut”, me të cilët ka biseduar për mundësitë e kthimit sa më të shpejtë të të gjithë të zhvendosurve nga lagjet veriore të qytetit, në pronat e tyre.
Kryetari i OJQ “Bregu i Veriut”, Dr Musa Miftari, ka vlerësuar fillimisht, se rezultatet e arritura kohëve të fundit në kthimin e shqiptarëve në lagjet veriore të qytetit, ku institucionet e pushtetit lokal nuk kanë kurrfarë kompetencash, për shkak se kjo pjesë ende administrohet nga UNMIK-u, janë inkurajuese dhe se për këtë merita kanë drejtuesit e komunës, në krye me kryetarin Kastrati dhe Qeveria e Kosovës.
Mirëpo, megjithëkëtë, ka thënë Myftari, ka ende shumë familje nga të gjitha lagjet veriore të qytetit, që jetojnë në kushte të vështira në pjesën jugore të qytetit e gjetiu dhe të cilat presin ndihmën e institucioneve të Republikës së Kosovës, e para së gjithash të komunës, që të kthehen në pronat e tyre, prej nga janë dëbuar dhunshëm nga ekstremistët serbë.
Miftari tha në vazhdim se komuna dhe Qeveria e Kosovës duhet të jenë edhe më të përkushtuar që të sigurojnë mjete dhe të rindërtojnë sa më shumë shtëpi në lagjet veriore për familjet që kanë jetuar atje dhe duan të kthehen, sepse ky nuk është interes i këtyre familjeve, por është interes kombëtarë.
Pasi kritikoi edhe disa kryefamiljarë që i kanë pronat në veri, për shkak të kërkesave të tyre jo korrekte lidhur me rindërtimin e shtëpive dhe për shkak të kushtëzimit, se ose duhet rindërtuar shtëpinë, madje ashtu si ata dëshirojnë, ose do ta shes atë, Miftari kërkoi nga drejtuesit komunalë që me të gjithë kryefamiljarët që do tu rindërtohen shtëpitë, të lidhen kontrata me të cilat pronarët obligohen të kthehen për të jetuar në to dhe u ndalohet shitja e tyre, në mënyrë që kështu të ndërpritet spastrimi etnik i lagjeve veriore, përkatësisht largimi i shqiptarëve nga atje, gjë të cilën e dëshirojnë ekstremistët serbë.
Edhe përfaqësuesit tjerë të lagjeve që janë drejtues të OJQ “Bregu i Veriut”, folën për gjendjen e rëndë në të cilën jetojnë familjet e zhvendosura nga lagjet veriore të qytetit dhe kërkuan që të ndahen më shumë mjete dhe të rritet dinamika e rindërtimit të shtëpive, sepse në njëfarë mënyre të zhvendosurit i ka kapluar njëfarë pesimizmi për mundësinë e kthimit të tyre në pronat ku kanë jetuar më parë.
Ata shtuan se është gjithnjë e më e mirë klima për kthim, pasi që, sipas tyre, edhe fqinjët e tyre serbë po e mirëpresin këtë kthim dhe po janë të gatshëm për ndërtimin e raporteve të mira fqinjësore, gjë që më parë nuk ishte kështu. Njëkohësisht u kërkua që të shtohet shumë më tepër përkujdesja institucionale për këto familje, pasi që gjendja e tyre ekonomik0-sociale është tejet e rëndë dhe në këtë aspekt, sidomos u kërkua që tu paguhet qiraja përderisa ato nuk mund të kthehen në shtëpitë e tyre.
Kryetari i Komunës, Avni Kastrati, pasi ju tha drejtuesve të OJQ “Bregu i Veriut”, se komuna dhe Qeveria e Kosovës janë vërtet të përkushtuara për kthimin e të gjithë të zhvendosurve në pronat e tyre, në të gjitha lagjet, pa marrë parasysh përkatësinë etnike të të zhvendosurve, për çka flasin edhe rezultatet e arritura në këtë drejtim gjatë dy viteve të fundit, u shpreh të jetë i gatshëm dhe t’i shtoj përpjekjet për sigurimin e mjeteve për rindërtimin e shtëpive, duke bashkëpunuar ngushtë me Qeverinë e Kosovës, e cila ka treguar edhe deri tash se një nga prioritetet e saj është edhe kthimi i të zhvendosurve lagjet veriore të Mitrovicës.
“Përveç kërkesave për rindërtimin e shtëpive në lagjet veriore, ka edhe shumë kërkesa tjera plotësisht të arsyeshme, por për fat të keq buxheti është tejet i vogël për plotësimin e menjëhershëm të tyre. Mirëpo, ne nuk do të ndalemi. Kemi premtimin e Qeverisë së Kosovës për të na ndihmuar dhe jam i bindur se do të vazhdoj procesi i rindërtimit të shtëpive në lagjet veriore. Kthimi në lagjet veriore është prioritet yni i përbashkët dhe interes i përgjithshëm”, ka thënë kryetari Kastrati.
