Kryetari i komunës, Avni Kastrati, ka pritur në një takim, pilotin e njohur shqiptaro-amerikanë, Xhejms Berisha, i cili është bërë i njohur ndër shqiptarët kudo që janë, me misionin e tij “Fluturimi për Kosovën”, me të cilin po e sensibilizon çështjen e Kosovës dhe po lobon në shtete të Botës për njohjen e pavarësisë së saj. Kryetari Kastrati i ka thënë Berishës se ashtu sikur të gjithë shqiptarët, edhe mitrovicasit krenarë për punën që ai po bënë me misionin e tij “Fluturimi për Kosovën”, duke e sensibilizuar çështjen e Kosovës në Botë dhe duke lobuar në shtetet anëtare të OKB-së për njohjen e pavarësisë së saj.
Kryetari Kastrati në vazhdim i tha Berishës se qytetarët, forcat politike dhe institucionet e komunës dhe ato të vendit po bëjnë përpjekje të mëdha që me mjete paqësore dhe në mënyrë institucionale të zgjidhin problemin e Mitrovicës, i cili është duke i preokupuar jo vetëm mitrovicasit, por edhe të gjithë qytetarët e Kosovës dhe shqiptarët në përgjithësi.
“Falë një angazhimi të këtillë, gjendja në Mitrovicë është gjithnjë e më relaksuese dhe më stabile, edhe pse herë pas here po ndodhin eksese, por të cilat fatmirësisht nuk po gjejnë mbështetje tek pjesa dërrmuese e qytetarëve të të gjitha përkatësive etnike.
Piloti Xhejms Berisha tha se e ka ndie si obligim që të bëjë diçka për Kosovën, për të cilën të tjerët kanë derdhur gjakun, andaj edhe ka vendosur që edhe ai të vendos një gur në kalanë e quajtur Kosovë.
“Vendosa që të fluturoj me aeroplan nëpër kontinente e shtete të Botës, për t’iu treguar atyre se tashmë Kosova është një shtet i ri, i cili duhet të njihet nga ato dhe të bëhet sa më shpejtë anëtare e OKB-së. Me misionin tim po bëjë përpjekje që pasqyrën e shtrembëruar për Kosovën që e ka përhap Serbia nëpër këto shtete, ta ndryshoj në të mirë dhe besoj se kam arritur që ta bëjë këtë”, tha Berisha.
Ai e njoftoi kryetarin Kastrati se brenda një viti ka fluturuar rreth 50.000 kilometra me aeroplanin e tij, duke qëndruar në 34 shtete të tri kontinenteve të botës, në të cilat ka lobuar për njohjen e Pavarësisë së Kosovës.
“Kjo nuk është punë e lehtë, sepse ka mjaftë peripeci. Kështu bie fjala, tash për vazhdimin e misionit në kontinentin e Afrikës, ku do të qëndroj në 54 shtete të saj, më duhet të aplikoj për vizë në 34 vende dhe të marrë 13 vaksinas, për shkak të gjendjes në disa nga këto shtete. Mirëpo, e tëra kjo, nuk është asgjë dhe nuk paraqet kurrfarë problemi, krahasuar më dëshirën vullnetin dhe obligimin që kam për Kosovën”, tha ai.
Piloti shqiptaro amerikan Xhejms Berisha, foli edhe për vështirësitë financiare që ka për vazhdimin e misionit, por tha se shpreson se institucionet dhe populli i Kosovës do ta ndihmojnë atë materialisht për realizimin e suksesshëm të këtij misioni.
Kryetari Kastrati i tha Berishës se ai dhe qytetarët e Mitrovicës e mbështesin pa rezervë misionin e tij dhe se vërtetë janë krenohen me të, ndërsa që në mbledhjen e Kuvendit të Komunës, që do të mbahet të enjten, këshilltarët do vendosin për shumën e mjeteve materiale për ta ndihmuar misionin e tij.
