Drejtuar nga kryetari i komunës, Agim Bahtiri, sot është mbajtur mbledhja e radhës e Bordit të Drejtorëve, ku janë diskutuar disa pika të rendit të ditës, që janë me interes për qytetarët e komunës së Mitrovicës.
Fillimisht drejtori për Financa dhe Zhvillim Ekonomik, Shukri Gashi, prezantoi para ekzekutivit raportin e dëgjimeve buxhetore për planifikimin e buxhetit për vitin 2020-2022, me ç’rast tha se për këtë vit janë mbajtur gjithsej nëntë dëgjime buxhetore.
“Të gjitha dëgjimet buxhetore janë mbajtur në Kuvendin Komunal pasi që grupet e interesit e kanë parë më të arsyeshme, prandaj pjesëmarrja e qytetarëve ka qenë e kënaqshme. Kërkoj nga drejtoritë përkatëse të shqyrtojnë kërkesat e tyre dhe ato të cilat janë më prioritet të jenë të realizueshme”, tha drejtori Gashi.
Po ashtu drejtori Gashi, lidhur me inkasimin e të hyrave vetanake për gjashtëmujorin e parë të vitit 2019, tha se ka rritje në krahasim me periudhën e njëjtë të vitit 2018 prej 55,88%, ndërsa sa i përket krahasimit të planifikimit dhe realizimit për këtë gjashtëmujor del se komuna e Mitrovicës ka tejkaluar planifikimin e këtij gjashtëmujori për 2.96%. Totali i përgjithshëm për këtë gjashtëmujor është 1,268,621.69 euro.
Ndërsa drejtori i Inspeksionit, Hysni Ahmeti, ka njoftuar ekzekutivin se përgjatë vikendit inspektorët komunal në bashkëpunim me Policinë e Kosovës kanë kryer kontrolle të shumta në lokalet e qytetit, zhurma e të cilëve është kthyer në burim shqetësues për qetësinë e qytetarëve.
Ai më tutje theksoi se jo vetëm këtë fundjavë por edhe në fundjavat në vijim, Drejtoria e Inspeksionit do të vijojë me kontrollet në lokalet e qytetit me qëllim sigurimin e qetësisë publike për qytetarët.
