Në Mitrovicë u mbajt manifestimi qendror për Festën e Abetares

Në sallën e sporteve “Minatori” është mbajtur manifestimi qendror “Festa e Abetares”, në të cilin kanë marrë pjesë nxënës nga Kosova, Shqipëria dhe Lugina e Preshevës. Salla e sporteve, si asnjëherë më parë dukej e bukur nga fëmijët e shumtë që kishin ardhur të veshur bukur e me shije për të kremtuar festën e Madhe të Abetares. Ishin këta fëmijë nga Prizreni, Prishtina, Ferizaj, Kamenica, Gjakova, Peja etj.

Në manifestim ishin të pranishëm edhe kryetari i Komunës, Agim Bahtiri, Zëvendësministri i Arsimit, Heset Sahiti, përfaqësues të institucioneve  arsimore nga Tropoja e Presheva, drejtorë të drejtorive komunale të arsimit nga Kosova dhe shumë mysafirë të tjerë.

Kryetari i Komunës, Agim Bahtiri, pasi ju dëshiroj mirëseardhje nxënësve, arsimtarëve dhe mysafirëve nga vendi, Shqipëria e Lugina e Preshevës, tha se kjo është festa më e dashur për të gjithë, sepse fëmijët janë dashuria më e madhe, janë shpresa dhe e ardhmja e vendit.

“Është Festa më e dashur sepse për këtë abetare, për këto shkronja të bukura shqipe kanë punuar  dhe janë flijuar shumë njerëz, patriotë të shquar të çështjes kombëtare”, tha ai.

Kryetari Bahtiri tha në vazhdim se nxënësit  meritojnë të festojnë përfundimin e Abetares bashkë me mësuesit, prindërit, me të gjithë të tjerët, për të kurorëzuar kështu punën e tyre të palodhur në mësimin e shkronjave dhe gjuhës shqipe.

Në vazhdim kryetari Bahtiri  falënderoi mësimdhënësit që punuan pa lodhur për të kurorëzuar këtë ditë dhe në veçanti mysafirët nga Shqipëria dhe Lugina e Preshevës.

“Jam krenarë që sot po festojmë me fatosat e Tropojës nga Shqipëria, të Preshevës dhe të gjitha trojeve shqiptare, si dhe jemi të vetëdijshëm për rëndësinë që ka Abetarja për nj edukim dhe arsimim në cilësor”, tha ai ndër të tjera.

Në manifestim folën edhe Zëvendësministri i Arsimit, Heset Sahiti, drejtori i Zyrës së arsimit nga Tropoja, Petrit Zeneli dhe  përfaqësuesi i Komunës së Preshevës Mentor Nuhiu.

Nxënësit kishin përgatitur një program të bukur dhe të pasur kulturor për festën e tyre.