Drejtori i Drejtorisë për Siguri dhe Emergjenca, z. Bahtir Maxhuni, ka pritur sot në takim përfaqësues të kompanisë Practal, me të cilët ka diskutuar rreth vizitave të qytetarëve në Parkun e Erës dhe çështjeve që lidhen me sigurinë e tyre.
Gjatë takimit u theksua shqetësimi për lëvizjen e qytetarëve në afërsi të turbinave të vendosura në këtë park, si dhe mungesën e respektimit të distancës dhe shenjave paralajmëruese të rrezikut. Përfaqësuesit e kompanisë kërkuan ndihmën dhe përfshirjen e komunës në përmirësimin e masave mbrojtëse për të parandaluar incidentet e mundshme.
Drejtori Maxhuni, pasi dëgjoi shqetësimet e paraqitura, shprehu gatishmërinë e tij për të mbështetur këtë çështje brenda përgjegjësive që i takojnë komunës. Ai theksoi rëndësinë e ndërmarrjes së masave konkrete në terren për monitorimin e mjedisit dhe përmirësimin e masave të sigurisë në zonën përreth turbinave.
Në përfundim të takimit, u bë apel për të gjithë qytetarët që vizitojnë Bajgorën për piknikë dhe fundjava që të jenë të kujdesshëm, të respektojnë distancat e sigurisë dhe të shmangin ndezjen e zjarreve pranë Parkut të Erës, për të mbrojtur natyrën dhe sigurinë personale.
