Me iniciativë të asamblistes Sazan Duraku Ramaxhiku, njëkohësisht prind i një fëmije me aftësi të kufizuara, dhe në koordinim me Drejtorinë e Arsimit, Mirëqenies Sociale dhe Shëndetësisë, është mbajtur një takim me rastin e 2 Prillit – Ditës së Ndërgjegjësimit për Autizmin.
Në këtë takim morën pjesë drejtori i Arsimit, Shefki Begu, drejtoresha e Shëndetësisë, Albina Kastrati Rama, drejtori për Mirëqenie Sociale, Ramadan Beshiri, si dhe drejtori i Administratës, Alban Fejzullahu. Të pranishëm ishin gjithashtu përfaqësues nga Qendra Burimore “Nëna Terezë”, drejtori i qendrës me stafin e tij, pedagogë, psikologë, pediatër, mësuese mbështetëse, asistente, drejtoreshat e institucioneve parashkollore, si dhe përfaqësues nga Enti Higjienik.
Gjatë takimit u diskutua për rëndësinë e ndërgjegjësimit dhe përkrahjes institucionale për fëmijët me autizëm dhe familjet e tyre. Me këtë rast, drejtori i Arsimit, Shefki Begu, theksoi se një ndër vendimet e para të kryetarit të komunës në mbështetje të kësaj kategorie ka qenë formimi i një komisioni të veçantë, i cili do të merret me identifikimin e nevojave të fëmijëve me nevoja të veçanta, me qëllim ofrimin e mbështetjes sa më të plotë dhe të qëndrueshme institucionale.
Ndërsa drejtoresha e Shëndetësisë, Albina Kastrati Rama, tha se angazhimi i tyre si institucion është i qartë të rrisin qasjen në shërbime, të përmirësojnë cilësinë dhe të jenë sa më afër qytetarëve që kanë më shumë nevojë.
Drejtori i Mirëqenies Sociale, Ramadan Beshiri, njoftoi për subvencionimin prej 50€ për fëmijët me autizëm, vendim i marrë nga Kryetari Faton Peci. Ai theksoi përkushtimin maksimal institucional për personat me aftësi të kufizuara, si dhe angazhimin për realizimin e Qendrës për Autizëm.
Ky takim shënon një hap të rëndësishëm drejt forcimit të bashkëpunimit ndërinstitucional dhe avancimit të shërbimeve për fëmijët me nevoja të veçanta në komunë.
