Donacion nga RAD Center me material shëndetësor për Ambulantën në lagjen “Adem Voca”

Drejtoria për Shëndetësi në Komunën e Mitrovicës ka pranuar një donacion të rëndësishëm me pajisje dhe materiale shëndetësore nga Qendra e Dokumentimit për Romë dhe Ashkali “RAD Center”, me financim nga Misioni i Kombeve të Bashkuara në Kosovë (UNMIK).

Në ceremoninë e dorëzimit të donacionit ishin të pranishëm drejtori i Shëndetësisë, z. Fahri Shabani, drejtori i Qendrës Kryesore të Mjekësisë Familjare, z. Fevzi Sylejmani, si dhe drejtori i  organizatës RAD, z. Bekim Syla.

Donacioni përfshin një gamë të gjerë pajisjesh mjekësore si: tensionmetra digjitalë dhe manualë, aparate për matjen e sheqerit në gjak, traka One Call Plus, stetoskopë, peshojë për foshnje dhe të rritur, karrige statike, aparate për inhalim, pulsoksimetra, si dhe materiale harxhuese si shiringa, kanula, gaza sterile, alkool, maska mbrojtëse dhe doreza jo sterile.

Këto pajisje dhe materiale janë dedikuar për Ambulantën e Mjekësisë Familjare në lagjen “Adem Voca”, dhe pritet të kontribuojnë ndjeshëm në rritjen e cilësisë së shërbimeve për qytetarët e kësaj zone.

Drejtori i Shëndetësisë, z. Fahri Shabani, me këtë rast tha se ky donacion që do të ndikojë drejtpërdrejt në përmirësimin e shërbimeve për qytetarët tanë.