Kryetari i komunës së Mitrovicës, Avni Kastrati, i shoqëruar nga këshilltari për siguri, Ylber Durmishi, ka vizituar të enjten Qendrën Operative Emergjente Rajonale (QOER), e cila është funksionalizuar para një muaji. Në takim me koordinatorin e kësaj qendre, Miran Demiri, kryetari Kastrati është njoftuar për kushtet e tyre të punës dhe sfidat me të cilat ballafaqohen. Kryetari Kastrati, pasi ju ka uruar për hapjen e zyrës dhe për suksese në punën e tyre të rëndësishme, ka ofruar mbështetje nga ana e komunës. Ai ka thënë se komuna do të ofroj ndihmë në kuadër të mundësive për të gjitha nevojat e tyre, përkundër asaj se kjo qendër funksionon në kuadër të Departamentit të Menaxhimit të Emergjencës (DME) të Ministrisë së Punëve të Brendshme (MPB).
Në anën tjetër, Miran Demiri, koordinator i QOER-së, tha se stafi prej 10 vetash janë akomoduar mirë në një objekt të ofruar nga Komuna e Mitrovicës, për çka falënderoj drejtuesit komunalë. Ai tha se qendra prej korrikut është funksionale dhe tashmë qytetarët janë duke e shfrytëzuar numrin emergjent 112 për rastet e tyre emergjente.
Demiri theksoi se kjo qendër është rajonale, e cila mbulon Mitrovicën, Skenderajn, Vushtrrinë, si dhe komunat e veriut të banuara me shumicë serbe. “Kjo është qendra e pestë rajonale që funksionon në Kosovë. Përderisa qendrat tjera ka vite që janë funksionale, kjo në Mitrovicë për shkaqe të ndryshme është funksionalizuar vetëm para një muaji”.
Sa i përket qytetarëve të komunave veriore të Kosovës, Leposaviqit, Zveçanit dhe Zubin Potokut, ai sqaroi se ende nuk ka thirrje prej tyre në këtë qendër. “Në ato komuna qytetarët shfrytëzojnë më tepër numrat e telefonit të operatorëve ilegalë të Serbisë, andaj automatikisht thirrjet prej atyre operatorëve arrijnë në qendrat emergjente të Serbisë, duke pasur parasysh se 112 është numër standard për emergjenca për gjithë Evropën”.
Demiri theksoi se qytetarët në përgjithësi janë në dijeni për funksionimin e kësaj qendre, e cila thirrjet e tyre i pranon në çdo kohë, mandej i verifikon, i specifikon dhe mandej koordinohet me institucionet përkatëse varësisht prej natyrës së rastit. “Gjatë 24 orëve mesatarisht ka nga 20 thirrje, mirëpo problem janë duke shkaktuar personat e pandërgjegjshëm të cilët bëjnë thirrje provokuese”, thotë ai, duke shtuar se ndodh që brenda një nate të ketë rreth 300 thirrje provokuese.
Ai sqaron se të gjitha thirrjet evidentohen, poashtu regjistrohen edhe numrat e telefonave dhe deshifrohen të gjithë. Në këtë drejtim ai bëri thirrje që mos të keqpërdoret kjo linjë, meqë një gjë e tillë pengon punën e qendrës. Poashtu ai tha se një gjë e tillë është edhe kundërligjore dhe ndaj personave që bëjnë thirrje provokuese mund të merren masa të parapara me ligj.
