Kryetari i Komunës së Mitrovicës, z. Faton Peci, së bashku me Kryeministrin në detyrë të Republikës së Kosovës, z. Albin Kurti, dhe ushtruesin e detyrës së ministrit të Ministrisë së Mjedisit, Planifikimit Hapësinor dhe Infrastrukturës (MMPHI), z. Hysen Durimishi, morën pjesë në inaugurimin e urës së re për këmbësorë mbi lumin Ibër.
Kjo vepër infrastrukturore paraqet një investim të rëndësishëm për qytetin e Mitrovicës, duke rritur sigurinë për këmbësorë, duke përmirësuar lidhshmërinë urbane dhe duke kontribuar në zhvillimin e përgjithshëm të qytetit.
Pas ceremonisë së inaugurimit, Kryeministri z.Kurti vizitoi Komunën e Mitrovicës, me ç’rast ka zhvilluar një takim me kryetarin z. Faton Peci. Kryeministri z.Albin Kurti e uroi Kryetarin Peci për marrjen e detyrës së re si Kryetar i Komunës së Mitrovicës dhe shprehu gatishmërinë e Qeverisë së Republikës së Kosovës për bashkëpunim të ngushtë institucional në realizimin e projekteve të rëndësishme për qytetin.
Gjatë takimit u diskutua për prioritetet zhvillimore të Komunës së Mitrovicës, projektet infrastrukturore, si dhe për koordinimin ndërmjet nivelit lokal dhe atij qendror, me qëllim të përmirësimit të shërbimeve dhe rritjes së mirëqenies së qytetarëve.
Komuna e Mitrovicës mbetet e përkushtuar në ndërtimin e partneriteteve të fuqishme me institucionet qendrore dhe në realizimin e projekteve që sjellin zhvillim të qëndrueshëm dhe përfitime konkrete për qytetarët.
