Kryetari i Komunës, Faton Peci, së bashku me bashkëpunëtorët e tij, sot ka bërë homazhe pranë pllakës përkujtimore në rrugën e Kovaçëve, në nderim të 31 civilëve shqiptarë të vrarë më 14 prill 1999.
Pjesë e këtyre homazheve ishin edhe familjarët e viktimave, të cilët me dhimbje dhe krenari përkujtuan më të dashurit e tyre, duke rikujtuar sakrificën e madhe për liri.
Në fjalën e tij, kryetari Faton Peci tha se kjo datë shënon një nga momentet më të errëta për qytetin, kur civilë të pambrojtur dhe të pafajshëm u vranë në mënyrë barbare nga forcat kriminale të regjimit të Sllobodan Millosheviqit. “Kjo masakër njihet si një nga masakrat më të mëdha në Mitrovicë, që fajin e vetëm e kishin veç pse ishin shqiptarë”, është shprehur ndër të tjerash ai.
Lavdi të rënëve! Gjaku i tyre u bëftë forcë për kombin tonë!
