Ndonëse afati për heqjen e rrethojave nga të gjitha institucionet në qytet, i dhënë nga Kuvendi i Komunës, ka kaluar, këtë vendim e kanë respektuar vetëm Komuna dhe policia e Kosovës, e cila e ka hequr rrethojën dhe është duke e rregulluar hapësirën ashtu si i ka hije një institucioni shtetëror dhe policia e Kosovës.
Mitrovicë, 19 korrik
Kuvendi i Komunës, në mbledhjen gjashtë të rregullt, mbajtur më 31.05.2010, pati marrë vendimin për largimin e rrethojave përreth të gjitha objekteve të institucioneve vendore e ndërkombëtare në qytet, për shkak se përveç që është uzurpuar një pjesë e hapësirës publike dhe janë bërë pengesë edhe për realizimin projekteve infrastrukturore, ato e kanë shëmtuar imazhin e qytetit, duke caktuar si afat të fundit datën 15 gusht 2010.
Për këtë vendim të Kuvendit të Komunës, kryetari i Komunës, Avni Kastrati, i ka njoftuar me kohë përfaqësuesit e institucioneve ndërkombëtare të pranishme në qytet e të cilat kanë rrethoja, siç janë UNMIK-u, OSBE-ja dhe UNHCR-ja.
Mirëpo, ndonëse afati për heqjen e rrethojave nga të gjitha institucionet në qytet, i dhënë nga Kuvendi i Komunës, ka kaluar, këtë vendim e kanë respektuar vetëm Komuna dhe policia e Kosovës, e cila e ka hequr rrethojën dhe është duke e rregulluar hapësirën ashtu si i ka hije një institucioni shtetëror dhe policia e Kosovës.
Mosrespektimi i vendimit të Kuvendit të Komunës nga ana e zyrtarëve të UNMIK-ut, OSBE-së dhe UNHCR-së në Mitrovicë, e ka detyruar kryetarin Kastrati që të ketë disa takime me përfaqësuesit e këtyre institucioneve ndërkombëtare, për të kërkuar nga ata që të jenë korrekt dhe të respektojnë vendimet e institucioneve legjitime të pushtetit lokal dhe t’i heqin rrethojat nga aty ku janë vendosur, të cilat, sipas të gjitha vlerësimeve, nuk kanë asnjë arsye të ekzistojnë.
“Përveç se po e shëmtojnë imazhin e qytetit dhe po i iritojnë qytetarët, rrethojat, qoftë ato të betonit, me grila apo tela gjemborë, kanë zënë një hapësirë publike dhe janë bërë pengesë për rregullimin e këtyre hapësirave. Nuk shoh asnjë arsye, as politike e as të sigurisë, që këto rrethoja të qëndrojnë edhe më tutje aty ku janë. Gjendja në Mitrovicë është gjithnjë e më relaksuese, ndërkohë që institucionet ndërkombëtare të pranishme këtu, nuk kanë pas asnjëherë problem nga qytetarët e komunës, andaj kërkoj nga ju që rrethojat t’i hiqni menjëherë”, ju ka thënë kryetari Kastrati përfaqësuesve të këtyre institucioneve ndërkombëtare, në bisedën që ka pas me ta lidhur me këtë çështje.
Duke shtuar se ekzistimi i këtyre rrethojave dhe mureve, sikur që është ai përreth selisë së UNMIK-ut në qendër të qytetit, krijon përshtypjen e një vendi me regjim ushtarak e që në fakt nuk përkon as për së afërmi me realitetin, kryetari Kastrati ju ka dhënë afat institucioneve të lartë përmendura ndërkombëtare, që deri më datën një shtator të këtij viti, të zbatojnë vendimin e Kuvendit të Komunës dhe t’i largojnë patjetër rrethojat.
Në të kundërtën, ai ka thënë se, bashkë me Kuvendin e Komunës, do të ndërmarrin masa të tjera, duke u bazuar në ligj.
Do theksuar se në takimin me kryetarin Kastrati, vetëm përfaqësuesit e UNHCR-së kanë shpreh gatishmërinë e tyre për t’i hequr rrethojat, ndërsa që ata të UNMIK-ut dhe OSBE-së, kanë pas qëndrim refuzues.
