Kryetari i Komunës së Mitrovicës, Faton Peci, ka vlerësuar atmosferën sportive dhe gjallërinë që e karakterizoi qytetin gjatë garës së vrapimit MitroRun, ku morën pjesë mbi 800 vrapues nga Kosova, rajoni dhe mërgata, në mesin e pjesëmarrësve në garë ishte edhe vetë Kryetari i Komunës, Faton Peci.
Kjo ngjarje sportive ishte bashkorganizim në mes Komunës së Mitrovicës, Korporatës Ujë Rugove dhe OJQ-së “7 Arte”.
Kryetari Peci ka theksuar se sporti në Mitrovicë po shënon zhvillim, falë mbështetjes infrastrukturore dhe organizimit të aktiviteteve të mëdha sportive, të cilat po e kthejnë qytetin në një hapësirë të garës, argëtimit dhe jetës aktive.
“Gjallëri, sport e jetë! Kjo është Mitrovica që ta kënaq shpirtin”, ka shkruar Peci, duke vlerësuar rëndësinë e MitroRun, i cili u zhvillua në tri distanca vrapimi dhe mblodhi pjesëmarrës nga vende të ndryshme.
Ai ka theksuar se synimi është që Mitrovicës t’i rikthehet krenaria dhe identiteti i saj sportiv, duke shfrytëzuar potencialin që ka qyteti për zhvillimin e sportit dhe organizimin e ngjarjeve të tilla.
“Mitrovicës po ia kthejmë krenarinë, identitetin sportiv me potencialin që ka!”, ka përfunduar Kryetari Peci.
