Në Mitrovicë u shënua Dita Botërore e Melanomës

Në bashkëpunim me Shoqatën e Dermavenerologëve të Kosovës dhe Drejtorisë për Shëndetësi u shënua Dita Botërore e Melanomës.

Melanoma është një nga llojet më të rrezikshme të kancerit të lëkurës. Ajo zhvillohet në qelizat ku prodhohet melanina, pigmenti që përcakton ngjyrën e lëkurës sonë. Njohja e simptomave të para të këtij lloj kanceri mundëson zbulimin dhe trajtimin e tij, përpara se sëmundja të përhapet. Melanoma mund të trajtohet suksesshëm, nëse zbulohet në kohë.

Specialistë të dermatovenetologjisë dhe infermierë të repartit të dermatovenerologjisë të Spitalit të Përgjithshëm “Dr. Sami Haxhibeqiri” të Mitrovicës në sheshin e qytetit ofruan këshilla shëndetësore për qytetarët lidhur me melanomën malinje dhe masat për zbulimin e hershëm dhe parandalimin e saj.

Masa më e rëndësishme për parandalimin e kancerit të lëkurës është një mbrojtje efektive nga rrezet ultravjollcë: të shmanget me çdo kusht djegia nga dielli, të qëndrohet në hije në orën 11 – 15, atëherë kur ngarkesa me rreze UV është më e madhe, të mbahen kapele, syze dielli dhe veshje të përshtatshme, të përdoret krem me faktor të lartë mbrojtës, të mos ekspozohen kurrë drejtpërdrejt në diell foshnjat deri në moshën njëvjeçare e veçanërisht fëmijët ёshtё mirë të mbrohen nga dielli.

Drejtori i drejtorisë për Shëndetësi z.Fahri Shabani, vizitoi profesionistët shëndetësorë në sheshin e qytetit dhe i falënderoi ata për këtë aktivitet të rëndësishëm edukativ shëndetësor.