Pas tri ditë shtyrje për shkak të punëve që po kryhen për rinovimin e objektit shkollor, të hënën ka nisur mësimi edhe në gjimnazin “Frang Bardhi” në Mitrovicë. Për të parë ecurinë e punëve këtë shkollë e ka vizituar nënkryetari i komunës, Riza Haziri, i cili ka vlerësuar se realizimi i këtij projekti do të ndihmoj për krijimin e kushteve më t ë mira për punë, si për mësimdhënës ashtu edhe për nxënës. Ai ka zhvilluar një takim me drejtorin e gjimnazit, Ahmet Fazliu, prej të cilit ka kërkuar që të specifikohen nevojat tjera që ka kjo shkollë në mënyrë që të kërkohen mundësi për gjetjen e mjeteve qoftë nga donatorët apo edhe nga buxheti vetanak i komunës. Nënkryetari Haziri, ka theksuar se komuna është duke shqyrtuar mundësitë që të ndihmoj për funksionalizimin e sallës së kulturës fizike në këtë shkollë.
Në anën tjetër, drejtori i gjimnazit, ka theksuar se projekti për rinovimin e objektit shkollor, ku përfshihet pullazi, mandej ndërrimi i dyerve dhe dritareve, mandej fasadimi i jashtëm etj, është në përfundim e sipër. Ai sqaroi se është dashur të shtyhet mësimi për tri ditë, derisa klasat janë bërë gati për mësim. Megjithatë ai tha se këto ditë mësimi do të kompensohen ose gjatë ditëve të vikendit ose në fund të vitit shkollor.
Drejtori Fazliu, tha se projekti financohet nga USAID-i dhe ka vlerën e 114 mijë eurove. Ai ka vlerësuar si shumë të rëndësishme këtë ndihmë që do të krijoj kushte më të mira për punë në këtë objekt shkollor, që nuk është rinovuar asnjëherë prej ndërtimit të tij në vitit ’60.
Ai potencoi se objekti i shkollës ka nevojë edhe për investime të tjera, si për rregullimin e dyshemesë, meqë klasat janë vetëm me beton dhe nuk ka fare dysheme. Poashtu ai përmendi problemet me instalimin elektrik, mandej nevojën për investime në meremetimin dhe funksionalizimin e sallës së kulturës fizike. “Në këtë shkollë ndjekin mësimet rreth 2 mijë nxënës, në pesë drejtime dhe në dy ndërrime. Përkundër investimeve që janë duke u bërë nevojat mbesin të mëdha që ky objekt të ofroj kushte të mirëfillta për procesin arsimor”, tha ai.
Zyrtarët komunalë njoftojnë se procesi mësimor në shkollat tjera ka nisur prej ditës së parë dhe nuk ka probleme.
