Reagim ndaj artikullit të publikuar nga Portali Jepi Zë me titull “Si vonë i doli gjumi: Mësimi përfundon këtë javë, e Mujka paralajmëron “masa rigoroze” në shkolla

Lidhur me artikullin e publikuar dje nga portali Jepi Zë për mbledhjen e Shtabit Emergjent të Komunës së Mitrovicës, është potencuar se kinse shtabi emergjent do të marrë masa rigoroze në shkollat e komunës sonë.

Pra, shkrimi i publikuar nga Portali Jepi Zë nuk ka të bëjë fare me qëllimin e takimit, pasi që në komunikatën e publikuar në ueb faqe të komunës është potencuar që anëtarët e Shtabit Emergjent kanë paralajmëruar kontrolle më të rrepta në hapësira publike për përdorim të maskës nga qytetarët, kontrolle në lokalet afariste, si dhe respektimin e orës policore nga ora 19:00 nga të gjithë qytetarët.

Ndërsa nga ana juaj me theks të veçantë është përmendur “masa rigoroze” nëpër shkolla, dhe kjo gjë fare nuk është përmendur në komunikatën e publikuar, dhe komuna është e vetëdijshme që mësimi në shkolla do të përfundoj të premten, ashtu siç është paraparë me vendimin e nivelit qendror për shkurtimin e gjysmë vjetorit të parë si pasojë e kësaj pandemie.

Andaj kërkojmë nga Portali Jepi Zë që të mos keqinterpretohen komunikatat e publikuara nga faqja zyrtare e komunës, sepse Komuna e Mitrovicës përmes kësaj ueb faqeje vazhdimisht bën përpjekje që të sensibilizoj e të informoj saktë e në kohë të gjithë qytetarët e Komunës së Mitrovicës për të gjitha aktivitetet që zhvillohen brenda dhe jashtë institucionit.

Prandaj ne konsiderojmë që shkrime të tilla pa informata të sakta dhe me qëllime të caktuara personale apo politike, që kanë për qëllim ta dëmtojnë imazhin e institucionit të Komunës së Mitrovicës,  nuk i kontribuojnë aspak situatës në të cilën po përballemi tash e disa muaj me virusin CoVid-19.