Dy automjete private kanë pësuar dëme si pasojë e një shpërthimi që ka ndodhur të hënën në orët e mesnatës, në një hapësirë afër një shtëpie private të një banori serb, pjesëtar i Policisë së Kosovës, në lagjen “Gjuroviq” të Zubin Potokut. Zëdhënësi i policisë, Besim Hoti, tha se në bazë të raporteve të para policore të siguruara nga hetuesit besohet që mjeti shpërthyes ka qenë një granatë dore, e llojit ende të paidentifikuar, e cila nën rrethana ende të pasqaruara ka shpërthyer pranë shtëpisë së ankuesit duke shkaktuar dëme materiale në dy automjete private dhe dëme të vogla,sipërfaqësore në muret e jashtme të shtëpisë. “Policia ka identifikuar vendin ku besohet të ketë qenë hedhur mjeti shpërthyes, ndërsa ekzaminimi i vendit të ngjarjes është në proces. Në lidhshmëri me rastin, policia ka ftuar në vend të ngjarjes edhe njësitë e specializuara për identifikim të mjete eksploduese të cilët pritet të bëjnë identifikimin e llojit të mjetit shpërthyes të përdorur në këtë rast”. Policia është duke zhvilluar hetimet intensive për të zbuluar shkaqet, motivet dhe të dyshuarit e mundshëm të këtij akti kriminal.
