Tre qytetarë të përkatësisë etnike serbe janë arrestuar të martën në Mitrovicë, si të dyshuar për përfshirjen e tyre në një rast të kërcënimit ndaj një banori të lagjes “Kodra e Minatorëve”, të përkatësisë etnike shqiptare të raportuar me 19 maj 2010. Zëdhënësi i policisë, Besim Hoti, tha se hetuesit policor kanë zbatuar një plan të veprimit për ndjekjen dhe arrestimin e personave të dyshuar dhe pasi të dyshuarit besohej se me dy automjete po qarkullonin nga zona e përgjegjësisë e stacionit Leposaviq, në drejtim të Mitrovicës, me sukses janë lokalizuar dhe ndaluar nga hetuesit policor në lagjen “kodra e Minatorëve” në veri të Mitrovicës. “Në momentin e tentimit të arrestimit të tre të dyshuarve, njëri nga ta, ka arritur që t’i shmanget arrestit duke u arratisur përkohësisht nga hetuesit policor, ndërsa në vend ngjarje, hetuesit kanë arrestuar dy nga tre të dyshuarit. Veç dy të dyshuarve të arrestuar, hetuesit policor kanë sekuestruar edhe dy automjete të tyre; një “Audi 80” pa targa të regjistrimit dhe një “Ford Escort” me targa “KV”, të cilat automjete besohet të ishin shfrytëzuar nga të dyshuarit për të kryer vepra tjera penale”. Ndaj dy të dyshuarve të arrestuar, prokurori publik ka caktuar masën e ndalimit policor deri në 48 orë, ndërsa i dyshuari i tretë i cili ishte arratisur është identifikuar dhe arrestuar të enjten në mëngjes nga hetuesit policor. Tre të dyshuarit, Arsic.S., Krstoviq I. dhe Radoseviq Z., gjatë ditës së stome, do të dërgohen para prokurorisë së qarkut të Mitrovicës, në vazhdim të procedurave të mëtejme gjyqësore.
