Pas përfundimit të shumicës së punëve në rregullimin e infrastrukturës së nevojshme në Varrezat e Dëshmorëve në Shipol të Mitrovicës, këto ditë është realizuar edhe një projekt për gjelbërimin e oazave dhe hapësirave skaj rrugës së tyre. Drejtuesit e komunës, sqarojnë se kjo punë është kryer në kuadër të projektit kryesor për Varrezat e Dëshmorëve. Bislim Imeri, drejtor i Drejtorisë së Bujqësisë dhe Zhvillimit Rural në Komunën e Mitrovicës, tha se për realizimin e këtij projekti “Gjelbërim përgjatë rrugës së Varrezave të Dëshmorëve” janë investuar mbi 9 mijë euro. “Është bërë një punë e mirë sa i përket gjelbërimit të hapësirave të gjelbëruara në këto varreza dhe kjo është mirëpritur edhe nga qytetarët”.
Ai tha se në rrugën kryesore me gjatësi 400 metra, në të dy anët e rrugës janë mbëltuar 100 fidanë me lartësi prej 2.5 deri në 3 metra. Poashtu, ai sqaroi se edhe në oazat në mes rrugëve janë mbëltuar 120 fidanë-shkurre të ulëta.
Drejtori Imeri theksoi se në të gjitha vendet ku janë mbëltuar fidanët është sjellë dhe i freskët në mënyrë që të fidanët të mos dështojnë. “Skaj rrugës dhe në oazat mes rrugëve është sjellë dheu i ri dhe është mbëltuar bari i ri”.
Ai theksoi se në plan është vazhdimi i gjelbërimit përreth Varrezave të Dëshmorëve, ndërsa për në vitin e ardhshëm planifikohet që të realizohet edhe projekti për gjelbërim në rrugët tjera në Varrezat e Qytetit që gjenden aty në afërsi.
