Nën udhëheqjen e Kryesuesit të Kuvendit Komunal të Mitrovicës, Safet Kamberi, dhe në bashkëpunim me Drejtorin për Buxhet dhe Financa, Gazmend Gjoshaj, është mbajtur konsultimi publik për Projekt-Buxhetin e Komunës së Mitrovicës për vitin 2027, si dhe parashikimet buxhetore për vitet 2028/2029.
Në takim morën pjesë drejtorë të drejtorive komunale dhe qytetarë të interesuar.
Gjatë takimit, Kryesuesi Kamberi theksoi rëndësinë e konsultimit me qytetarët, ndërsa Drejtori për Buxhet dhe Financa, Gazmend Gjoshaj, prezantoi të dhënat dhe ndarjet e parapara në Projekt-Buxhetin për vitin 2027, i cili është planifikuar në vlerë prej 34,045,130 euro.
Sipas prezantimit, për paga dhe mëditje janë planifikuar 18,950,980 euro, për mallra dhe shërbime 5,100,000 euro, shpenzime komunale 700,000 euro, subvencione dhe transfere 1,294,150 euro, ndërsa për investime kapitale 8,000,000 euro.
Në përfundim, qytetarët e pranishëm parashtruan pyetje dhe dhanë propozime lidhur me ndarjet buxhetore, duke shprehur kërkesat e tyre për përfshirje në Projekt-Buxhetin final për vitin 2027.
