Sot në Qendrën e Kulturës “Rexhep Mitrovica” buzë lumit Ibër, u mbajt akademi përkujtimore për dy dëshmorët e rënë gjatë luftës së fundit në Kosovë, Sami Gashi dhe Afrim Hajrizi.
Në këtë akademi përkujtimore ishin të pranishëm kryetari i komunës, Agim Bahtiri, zëvendëskryeministri i Kosovës, Enver Hoxhaj, ministri i Financave, Bedri Hamza, drejtorë komunal, familjarë të dëshmorëve, përfaqësues të shoqatave të dala nga lufta, si dhe një numër i konsiderueshëm i qytetarëve.
Në fjalën e tij kryetari i komunës, Agim Bahtiri, tha se është mirë që organizohen tubime të këtilla përkujtimore, përmes të cilave kujtojmë kontributin e jashtëzkonshëm që kanë dhënë dëshmorët tanë në luftën për çlirimin e atdheut.
“Çdo herë është krenari kur ne jemi së bashku për të parë ata që janë sakrifikuar për këtë vend. Prej gjakut të tyre të derdhur ne jemi këtu ku jemi, në liri. Sot jemi të lirë, mirëpo kjo liri duhet të jetë mbi një forcë të fuqishme që e mbron çdo pëllëmbë të këtij vendi. Duhet të bashkohen nga kryetari i shtetit e deri tek ai që ka luftu për këtë vend. Ti dalim Zot atdheut”, ka thënë kryetari Bahtiri.
Në këtë akademi mori fjalën edhe zëvendëskryeministri i Kosovës, Enver Hoxhaj, i cili në emër të kryeparlamentarit të Kosovës, Kadri Veseli, falënderoi të pranishmit. Ai tha se 20 Janari është dita kur përkujtohen këta dy dëshmorë, është një ditë e cila përkujton themelimin e lirisë së Kosovës.
“20 Janari është një ngjarje e veçantë për Mitrovicën edhe për Kosovën edhe për kombin shqiptar kudo që bukës i thonë bukë, e ujit i thonë ujë. Është një ditë që ka të bëjë me themelin e lirisë sonë, ne sot jemi mbledhë pas 20 vitesh që ta shënojmë këtë ngjarje të rëndësishme për Kosovën. Vepra e tyre është synimi më i mirë për ta kuptuar rrugën e gjatë që ne kemi bërë si popull për lirinë tonë. Sakrifica e Samiut dhe Afrimit është themel i pavarësisë sonë”, tha ndër të tjerash zëvendëskryeministri Hoxhaj.
Pjesë e manifestimit ishte edhe nënkryetari i OVL- UÇK-së në Komunën e Mitrovicës, Bahtir Maxhuni, i cili i falënderoi të pranishmit për prezencën e tyre duke thënë se ardhja e tyre në këtë akademi është nderë dhe respekt për të gjithë ata që kanë luftuar dhe kanë rënë dëshmorë në këtë vend.
Para të pranishmëve u lexua edhe biografia e dy dëshmorëve të rënë në luftën e fundit Sami Gashit dhe Afrim Hajrizit.
