Në sheshin “Adem Jashari” në Mitrovicë është bërë hapja e festivalit të parë të Panairit për promovimin e traditave dhe kulturës së qytetit.
Ky festival i mbështetur nga Komuna e Mitrovicës, respektivisht, Drejtoria për Kulturë, Rini dhe Sport, është organizuar nga organizata “CECD- Friends”, drejtuar nga znj.Valbona Sadiku.
Tendat e vendosura në sheshin e qytetit ishin të mbushura me artizanate të bukura tradicionale, me veshje kombëtare të qëndisura me kujdes, punime të punuara me dorë dhe aroma e ushqimeve tradicionale përcjellin vizitorët në një përvojë të veçantë.
Hapjen e këtij festivali e ka bërë, znj. Valbona Sadiku, nga organizata “CECD- Friends”, e cila theksoi rëndësinë e kësaj ngjarje për Mitrovicën dhe më gjerë.
“Këtë herë jemi mbledhë të gjitha organizatat të cilat merren me kulturë dhe traditë, duke i përfshirë edhe minatorët e Trepçës, “Shqipet e Vogla” dhe kemi arrite të krijojmë një festival të parë të traditës dhe kulturës mitrovicase”, është shprehur ajo.
Ndërsa në fjalën e tij, drejtori i Drejtorisë për Kulturë, Rini dhe Sport, z. Fahri Jashari, tha se festivali është një rast i mirë i promovimit të traditës së zonës së Mitrovicës që e hapi edhe këtë festival.
“Është një projekt shumë i rëndësishëm, organizimi i festivalit të ushqimit me produkte dhe veshje tradicionale, në veçanti të ndërmarrësve ose grave të vyera të Komunës së Mitrovicës. Ky festival financohet 100% në shumën totale të projektit nga subvencionet përmes thirrjeve publike të Drejtorisë për Kulturë, Rini dhe Sport”, tha ndër tjerash drejtori z. Jashari.
