Me rastin e shënimit të Ditës Botërore të Shëndetit Oral, Komuna e Mitrovicës, përkatësisht Drejtoria e Shëndetësisë gjatë gjithë javës ka organizuar ligjërata në Shkollat Fillore të Mesme të Ulëta, me qëllim të vetëdijesimit dhe edukimit të nxënësve për rëndësinë e shëndetit oral.
Këto ligjërata janë mbajtur nga personeli shëndetësor i Qendrës Kryesore të Mjekësisë Familjare “Dr. Nexhat Çuni”, konkretisht nga sektori i shëndetit oral, të cilët kanë dhënë kontribut të çmuar në promovimin e kujdesit dhe higjienës orale tek nxënësit.
Aktivitetet janë zhvilluar në disa institucione arsimore, si dhe është realizuar vizitë edhe në organizatën Handikos, duke përfshirë edhe fëmijët me nevoja të veçanta në këtë nismë vetëdijësuese.
Drejtorja për Shëndetësi mori pjesë në ligjëratën e mbajtur në SHFMU “Gjergj Kastrioti – Skënderbeu”, me ç’rast falënderoi personelin shëndetësor për angazhimin e tyre, shkollat për bashkëpunimin e vazhdueshëm, si dhe “Rotary Club Mitrovica” për mbështetjen dhe shpërndarjen e pakove higjienike për nxënësit.
Në përmbyllje të kësaj jave, Drejtoresha e Shëndetësisë znj.Albina Kastrati Rama ndau mirënjohje për stafin mjekësor pjesëmarrës, dhe “Rotary Club Mitrovica” për përkrahjen dhe bashkëpunimin e tyre në realizimin me sukses të kësaj nisme.
